新界面積最細嘅一區—葵青區

阿史早前喺荃灣新市鎮嘅時候都有同大家提過葵青區，顧名思義就即係葵涌同青衣兩個區加埋。雖然葵青區嘅範圍係葵涌同青衣加埋，但其實呢一區先係十八區入面新界面積最細嘅一區。

早喺明朝郭棐編撰嘅《粵大記·廣東沿海圖》，就有「葵涌」嘅出現，明朝亦有唔少客家人移居到葵青區。位於新界南部嘅葵青區，原本係屬於荃灣區，喺1985年就獨自成為十八區入面嘅一個行政區域，當時喺區議會入面係叫做葵涌及青衣區議會，後來先縮寫成葵青區議會。講到葵青區嘅特色，就係較多公共屋邨，一共有成27個，主要集中喺青衣島及北葵涌等，史友們如果有印象，都會記得比較出名嘅舊式屋邨大窩口邨、葵涌邨。

既然係新界入面最細嘅一區，咁到底葵青區有幾細呢？答案就係21.82平方公里喇，但係呢度同時都係葵青貨櫃碼頭所有嘅地方，係重要嘅工業區。同唔少區一樣，呢度同樣都係係區域分界嘅問題，過去對於呈祥道、荔枝角以北一帶山脈嘅分界爭議，仲引起過區議會嘅討論，而集團式嘅樓盤廣告都因為搞唔清分界而中招，有機會阿史就再同大家講一講。