世上人口密度第二高嘅島嶼——鴨脷洲

同葵青區一樣，喺明朝嘅《粵大記》入面就有記載鴨脷洲早有先民居住，當時地圖上係以「香港」嚟標示呢個島嶼。時至今日，鴨脷洲已經係南區一個重要嘅住宅區。

鴨脷洲，位於港島南區香港仔對開，據講早年嘅得名係同佢形狀生得似鴨脷有關，早期嘅人口主要係由泉州人組成。呢個面積只有1.3平方公里嘅地方，喺早幾年嘅統計就指出足足住咗接近9萬人，係世界上人口密度第二高嘅島嶼。

喺1940年代果陣，鴨脷洲仲未係以住宅為用途，英軍就喺鴨脷洲玉桂山上修建鴨巴甸炮台（Aberdeen Battery）鎮守香港南面海岸及南丫島一帶，但隨住英軍失利擔心炮台落入日軍手中，自行將炮台破壞，先至有後來鴨脷洲嘅發展。依家嘅鴨脷洲係依靠一條橋連接住香港仔同埋黃竹坑，雖然島仔細細以住宅為主，但其實都叫做有商場同埋工業區。