早排阿史就同史友們介紹到國歌嘅起源係因為一套電影風雲兒女,而喺相近嘅時代背景,仲有一首叫做《黃河大合唱》嘅交響樂合唱,喺抗日戰爭入面起過重要嘅鼓舞作用。喺介紹呢首歌之前,阿史就想先同大家講一講呢首歌嘅作曲家冼星海。

有「人民音樂家」之稱嘅冼星海,祖籍廣東番禺欖核,出生喺1905年嘅澳門一個疍家船工家庭。幼年嘅時候因為屋企嘅生計問題而跟隨母親去到新加坡,亦都係因為入讀咗養正學校,得到區健夫老師賞識佢嘅音樂才華,畀佢入到學校軍樂隊。後來就因校長林耀翔親自帶洗星海返到廣州升學。1928年完成咗上海國立音樂專科學校課程之後,洗星海就去到巴黎升學,考入巴黎音樂學院,創作過唔少作品。

到咗1935年,佢決心返到中國參加抗日救亡運動,喺期間就作過唔少群眾歌曲,並為影片《壯志凌雲》、《青年進行曲》、話劇《復活》、《大雷雨》等配樂,開展救亡歌詠運動。至於《黃河大合唱》就係佢喺延安嘅時候所創作,亦都係最廣為人知嘅一首。

1945年,年僅40歲嘅洗星海就因為肺結核病逝莫斯科,因為居勢問題先喺當地安葬,去到1980年代就將骨灰移返中國,最終安葬喺廣州。

原圖嚟自網絡