後世供奉周倉但原來無此人

如果史友們拜過去關帝廟到見到關公像，佢身邊都會有關平同周倉兩位近身守護住。睇過《三國演義》或打過三國志系列遊戲嘅史友，都會知道周倉係劉備旗下一員猛將。之不過，唔少人對周倉都其實有相當誤解。

响三國演義當中，周倉本來係黃巾軍張寶嘅馬仔，後嚟黃巾賊被滅後佢就眾於山林成為山賊，後嚟周倉响臥牛山與關羽初遇，因仰慕關公之名而成為佢嘅近身。而响民間信仰當中，周倉通常配祀於關聖帝君之右側，左側為關平太子，信眾通常尊稱周倉為周倉將軍。

不過咁，响歷史上其實係無周倉呢位人物，佢嘅「生平」都係後世人作出嚟，特別係元明時代，文人將佢嘅「生平事蹟」寫到好似真嘅一樣，日本啲三國遊戲當然都受影響。至於周倉係點嚟，唔少人都認為係從正史中關羽去同孫吳謀士魯肅面談時，席間關羽一位隨從喝斥魯肅，而呢位隨從就係周倉嘅原型。