喺沙頭角同埋深圳市之間,有一條由雙方共同管理嘅街道,叫做中英街;而喺呢條中英街上,就有一組標誌住分界嘅中英街界碑,講開真係有段故。

要知道中英街所在嘅位置,係邊境禁區,如果要入內嘅話,無論係香港定係內地居民都係需要申請邊境禁區通行證,咁點解早年會將呢個區域定為為邊界呢?喺1898年嘅時候,英國政府就同清政府簽訂咗一份《展拓香港界址專條》租借新界,並且喺同年3月16日開始進行為期2日嘅勘界。咁勘界果陣,就以沙頭角河潮漲最高嘅水位作為兩地嘅分界線。隨住河水乾涸,喺二戰發生之前河床就已經冇水,形成咗一個天然嘅平地,兩地嘅居民都去到河床設立商店,仲改埋名叫做「中興街」,呢個就係中英街嘅前身。

據講當年嘅中英街一共有八塊邊界界碑,設立喺中英街正中位置,其中一塊仲刻有面對深圳一面刻有中文「光緒二十四年 中英地界 第1號」;面對香港一面刻有英文「ANGLO•CHINESE BOUNDARY 1898 No.1」。唔講唔知,其實3至7號界碑喺日軍侵占香港嘅時候就曾經被拔除,依家睇到嘅都係喺1948年4月中英街雙方喺沙頭角重豎嘅界碑

原圖嚟自網絡