胡忠大廈前身係迪龍里？

呢排阿史睇返啲舊相，就發現咗圖入面呢幅迪龍里嘅舊照，有返咁上下年紀嘅史友可能都會聽過呢條消失嘅掘頭巷，依家就已經經過重建起咗胡忠大廈。

喺港島舊區灣仔嘅皇后大道東上面，曾經有一條名為迪龍里（Tik Loong Lane）嘅巷仔，呢條巷幾時建成就已經無從稽考，但照入面嘅建築推斷大概都知道佢嘅歷史有幾悠久。巷口以前嘅一間林宏隆玻璃廠推斷，喺1880年之前就已經喺呢條巷做生意。而喺呢條巷入面，仲有兩座歷史好悠久嘅建築，分別係綏靖伯廟以及濟公廟。而且，建於1847年嘅三號差館亦都係喺呢個巷仔位置。

踏入80年代，灣仔大興土木，展開唔少重建工程，迪龍里嘅位置就被重建成胡忠大廈。