現代出街唔想帶錢有好多方法可以做到，例如移動支付又或者碌卡都搞得掂，咁喺古代啲銅錢咁沉重嘅時代，古人又有冇諗過點解決呢？答案就係飛錢喇！

喺中國歷史上，飛錢算得上係迄今為止已知嘅紙幣雛形，但飛錢最初並唔係當錢咁用。呢種匯票起源自唐憲宗時期嘅一種匯兌制度，由於當時嘅經濟相當發達，商業活動頻繁，再加上銅錢、黃金以及白銀嘅流量都唔足夠，對商業活動有所限制。而且，仲有一個問題，呢啲錢幣都有返一定嘅重量，喺攜帶上嚟講就相當不便。於是就有人諗到建立一種匯兌制度，商人先喺京城入面將錢交畀諸軍、諸節度使、諸道進奏院等，等對方開返張立票券，商人就可以去到其他地區嘅辦事處拎錢。

有咗呢種方法嘅出現，令到唔少商人都唔再需要拎住一大筆錢進行商業貿易，雖然唔係直接當紙幣咁用，但飛錢都被視為係最早已知紙幣嘅雛形。

原圖嚟自網絡