喺唔少電影同埋電視劇入面，只要一提到清朝，都會提到八旗子弟，阿史好耐之前就已經有個疑問，就係八旗到底有邊八個，當中又係點分呢？今次就同史友們講一講呢個問題。

所謂嘅「八旗」槪念集軍事、行政權力於一身，呢個制度係來自女真人射獵小隊「牛錄」，呢個概念由努爾哈赤進一步革新，喺1615年成為一個八旗制度，分別有鑲黃、正黃、正白、正紅、鑲白、鑲紅、正藍、鑲藍八個旗色。而隨住往後幾十年嘅征戰，八旗子弟去到清朝嘅時候就已經唔單止係滿洲人，仲有蒙古同埋漢軍嘅八旗，但都係以滿洲為核心。

八旗集行政、軍事、社會、等職能於一身，以「出則為兵，入則為民」為宗旨，喺戰爭嘅時候就係抽調兵丁，作戰完畢後就回歸牛錄以耕養戰，而八旗子弟喺教育、科考、任職、律法等政治、經濟領域均享有一定特權。

八旗嘅顏色同尊卑係有關係，早年嘅旗色就只有正黃、正白、正紅、正藍，至於鑲黃、鑲白、鑲紅、鑲藍就係後加嘅。而喺最早嘅紀錄順序，旗色嘅排序係正黃、鑲黃、正紅、鑲紅、鑲藍、正藍、正白、鑲白，而呢個排序亦都隨住歷來嘅君主決定已不斷改變。

原圖嚟自網絡