早幾日阿史就講到日軍佔據香港第三年嘅時候,即係1944年,紅磡一帶就曾經因為盟軍嘅空襲而陷入一片火海之中,造成300幾人死亡。類似嘅事件喺1945年亦都發生過,而呢次就喺港島北。

喺1945年嘅1月15同埋16日,盟軍採取空襲日本嘅攻略,美國陸軍航空隊就派出咗471架飛機、用咗150噸炸彈攻擊香港,而且為咗奪取制空權,仲發射咗120枝火箭呢次空襲令到唔少重要設施就好似軍艦錨地、太古船塢、油庫、維港船舶都受到破壞,啟德機場亦都係其中一個目標。呢次嘅轟炸,美軍就一共放咗14個500磅炸彈以及649個100至2000磅炸彈,呢個亦都係其中一個原因,點解港島一帶後來有咁多未爆嘅戰時炸彈。

而去到同年嘅6月12日,盟軍就再次轟炸港島,今次就以燃燒彈空襲中環、銅鑼灣及西環呢幾個地方,當中以中環災情最為嚴重,唔少房屋都被焚燬,當中蘇杭街、皇后大道中有唔少住宅都中彈,造成100死50傷,仲有好多人失去家園。

原圖嚟自網絡