粉嶺圍村同埋聯和墟嘅歷史阿史都同大家講唔少,講到粉嶺聯和墟嘅地標,其實唔單止得聯和市場,仲有一項西式建築,就係天主教粉嶺聖若瑟堂。

呢座建於1953年嘅建築,係聯和墟現時僅存嘅教堂,亦都係呢區教友嘅活動中心。早年嘅新界並冇太多西式建築物,而呢類型建築嘅出現,好多時候都係同傳道人有關。天主教嘅傳道工作早喺1926年就喺新界開展,而聖若瑟堂就係由商人朱仁傑喺1952年捐出土地,賴法禹神父再喺1953年聯絡粉嶺軍營英軍同埋外籍警察建成,並且以聖若瑟為主保,定名「粉嶺聖若瑟堂」。

聖堂原本就位於農地,所以建成之後都仲有唔少農田圍繞。呢座以花崗石鋪砌嘅建築,中央有座鐘樓懸掛三個意大利製造銅鐘,喺教堂建成之後先加建,每逢要通知教友入內,都會拉到銅鐘,呢個傳統維持至今。而聖堂正門,亦都有一個手抱小耶穌嘅聖若瑟像、入面仲有三為一體嘅圓拱窗以及極具東方教會特色嘅聖像畫。

時至今日,聖若瑟堂對粉嶺教友信仰有住獨特嘅意義,當中嘅教堂、活動室及神父宿舍亦都被列為三級歷史建築。

原圖嚟自網絡