東華三院史友們都應該聽唔少,但東華三院有邊三院大家又知唔知呢?答案就係東華醫院、廣華醫院同埋東華東院,上次介紹過東華醫院之後,今次阿史就想講一講廣華醫院。

東華三院之一嘅廣華醫院,喺1911年成立,位處油尖旺區油麻地窩打老道,係當年九龍半島第一間醫院。喺早年嘅香港,九龍區並冇具規模同標準嘅醫療設施,當時病咗嘅華人都需要去到香港島就醫,唔少病人都因為咁而得唔到有效嘅治療。隨住九龍區嘅人口增加,再加上一班華人領袖喺1907年曾經提議喺油麻地建立中式醫院,何啟爵士就係其中一位。港府最後就喺1911年通過《1911東華醫院擴展法例》,喺油麻地撥地12萬3,500平方呎興建醫院。

建成後嘅廣華醫院規模最初只係可以容納到72個住院病人,而且籌集到返嚟嘅善款亦都唔多,經營相當困難。於是,華民政務司就喺1914年邀請東華醫院、廣華醫院及油麻地天后廟值理舉行會議,經過多年討論先至得到天后廟管理權及歷年存款58,000蚊補貼。

喺往後嘅幾十年間,廣華醫院就先後加建設施以及作出新嘗試,就好似首次訓練護士、手術室翻新、設立護養院並且大規重建,近來一次嘅重建就係1997年7月完成為期三年嘅大規模翻新修葺工程。之所以叫做「廣華」醫院,就為咗表明服務廣東華人為主。

原圖嚟自網絡