香港早年嘅商業報紙 孖剌西報

早排阿史都同史友們介紹過唔少香港開埠初期嘅報紙，就好似中文報紙《華字日報》、《循環日報》同埋英文報紙《德臣西報》，今次就想同史友們介紹一下早期香港嘅商業報紙，孖剌西報。

《孖剌西報》（Daily Press），曾經叫做《每日雜報》，早喺1857年10月1日就創刊，係香港最早期嘅商業報紙，主要報導當時嘅航務，言論，中外新聞，行情物價等等。孖剌西報發行超過八十年，當時由賴登（George M.Ryden）、莫羅（Yorick J.Murrow）擔任呢份報紙嘅主編，雖然係商業報紙，但就對當時嘅港府持有批判嘅態度，並且喺創刊嘅第二年，其中一位主編賴登（George M.Ryden）就因為針對怡和洋行嘅報導被怡和以誹謗罪控告，被判決六個月有期徒刑。

喺發行嘅初期，據講逢星期一、三、五買《孖剌西報》就會附送埋《香港船頭貨價紙》；至於逢星期二、四、六附送中國歷史上第一份中文商業報紙《香港中外新報》，真係買報紙送報紙。