早排阿史就已經同史友們提過日本沖繩縣石垣市就提交咗表決議案,提出會將「釣魚島」改名做「登野城尖閣」,而喺日前呢個議案就以多數贊成票通過,石垣市嘅行政區劃所包含嘅釣魚島就會改名「登野城尖閣」。

對於呢個決定,中方表示遺憾同埋嚴正抗議,外交部就表示日方通過所謂「更名」議案,係對中國領土主權作出嘅嚴重挑釁,並且唔能力改變釣魚島屬於中國嘅事實。

關於呢個島嘅爭議,其實喺1971年美國就同日本簽署《歸還沖繩協定》,並且喺1972年將琉球群島管理權移交畀日本新成立嘅沖繩縣進行管轄,呢個就係中日喺釣魚島領土糾紛嘅開端。

而早喺1543年,喺琉球國冊封使陳侃嘅《使琉球錄》上就有關於釣魚島嘅描述,亦都係因為呢份紀錄,演變出琉球人發展嘅航行路線,並且喺明清年間編寫出《順風相送》、《福建沿海山沙圖》、《指南廣義》、《臺海使槎錄》等文獻,當中都係將釣魚島當成是航行座標,並且將釣魚島列為中國境內,屬於福建海防區域。呢啲文獻亦都成為重要嘅證據,證明釣魚台諸島「自古以來是中國的」。

原圖嚟自網絡