佐敦道原名係第六街？

之前阿史都同史友們介紹過好多區嘅古蹟同埋建築物，今次就同大家講下一啲街道故事。

喺油尖旺區，有一條西邊係海寶路，通往加士居道嘅道路，叫做佐敦道。呢條路早喺1887年就建成，當時係叫做第六街。咁到底點解會叫做佐敦道呢？據講喺1909年嘅時候油尖旺區進行過一次街道名稱嘅重整，唔單止將第六街改名叫做佐敦道，同年仲將加士居道南列入佐敦道。而「佐敦」喺當年《南華早報》1909年5月31日嘅讀者來信入面就有講到，係時任英國駐華公使佐敦爵士朱邇典。

油尖旺區經過多年發展，街道嘅規模已經唔同晒，原本道路西端嘅盡頭唔再係佐敦道碼頭，而係延伸咗做西九龍填海區。唔講唔知，佐敦道以南嘅部分其實禁止公共小巴進入，而呢個範圍仲喺2011年進一步擴充到由加士居道到廣東道之間嘅佐敦道。