由香港政府興建嘅水塘阿史都介紹過唔少，至於由私人機構興建嘅水塘，唔知史友們又知唔知呢？畀啲提示大家，呢個地方依家係叫做賽西湖公園。

如果有經過呢個公園嘅史友，可能都已經知道阿史今次係想介紹七姊妹水塘。位處寶馬山北麓嘅七姊妹水塘，係由太古洋行喺1883年喺北角七姊妹區所建立嘅一個私人水塘，當時興建嘅目的係為咗供水畀鰂魚涌太古船塢、太古糖廠及香港汽水廠使用。而為咗供應淡水畀糖廠，喺柏架山仲有一個1894年建成嘅太古水塘，太古洋行喺柏架山及寶馬山合共就有三座水塘，認真巴閉。三個水塘之中，就以七姊妹水塘容量最大，所以喺1894-1895年香港發生旱災，太古都有將七姊妹水塘嘅水以鐵船運到中環舒緩水荒。

去到1972年太古糖廠結業，1977年七姊妹水塘就被填平用嚟興建賽西湖大廈，部分土地就交返畀政府管理，七姊妹水塘5號水壩水管隧道口遺跡就被保留落嚟。呢度之所以有「賽西湖」嘅稱呼，係因為當地居民覺得當時水塘嘅風光拍得住杭州西湖，所以就叫「賽西湖」喇！

原圖嚟自網絡