由兩部分組成的新市鎮 粉嶺/上水新市鎮

又返到新市鎮系列，今次主題終於就嚟到香港最北部嘅新市鎮，呢個由上水以粉嶺組成嘅新市鎮，集工業、商業、住宅同埋自然環境於同一區，係一個綜合式發展嘅新市鎮。

呢個新市鎮係由上水以及粉嶺兩個分區組成，地理上嚟講即係由粉嶺聯和墟去到粉嶺塘坑馬會道上水工業區以及文錦渡路一帶，範圍相當廣並且被唔少山河圍繞，成個發展面積達到7.8平方公里。

喺未有新市鎮計劃之前，現時上水同埋粉嶺一帶就早在鄉村發展，上水鄉、粉嶺圍、馬屎埔村等等，都係喺依家嘅新市鎮範圍之內；而區內原本就有石湖墟同聯和墟兩個重要嘅墟市，做到自給自足。而踏入70年代後期，當時嘅港府就計劃發展上水同埋粉嶺一帶，將呢度建立成一個現代化新市鎮，先係由上水市中心開始發展，80年代就輪到粉嶺鐵路站以北，再逐步發展粉嶺南以及上水第36區。除咗以上提到呢四區，據聞喺未來仲會加入古洞北及粉嶺北新發展區，到時新市鎮就會叫做粉嶺／上水／古洞新市鎮。