香港有唔少特色嘅古廟,除咗早前阿史同大家介紹過嘅侯王廟、關帝廟、玉虛宮等等,觀音廟亦都係為數唔少嘅廟宇,當中就以紅磡觀音廟最具規模。

位於紅磡差館里嘅觀音廟,係喺1873年(清朝同治12年)由紅磡三約(紅磡約、鶴園角約及土瓜灣約)街坊合資興建,現時已被列為一級歷史建築。講起呢座廟就真係相當有傳說色彩。據講1909年嘅時候港府想喺開通紅磡、九龍城及尖沙咀嘅交通,點知喺掘地果陣就由紅色嘅水柱喺地底湧出,當時工人就覺得係掘傷龍脈,唔敢要繼續開工,事後仲要集資重修觀音廟,希望得觀音庇蔭。如果從科學嘅角度出發,當時就化驗出呢啲紅色水係由地下水銀同埋琉璜混合而成,真係信不信由你。

呢座觀音廟係最具規模嘅觀音廟之一,分成三座。正座就係觀音廟,左邊公所改為紅磡三約街坊會中醫診所而右邊就係書院。至於正座觀音廟亦都有兩進,分為中堂同正殿,就咁聽到感覺到紅磡觀音廟有幾大。

原圖嚟自網絡