1850年代有條寶靈頓運河?

喺香港開埠初期，港島係當時港府重點發展嘅地方，由政府機構、軍營去到商業中心都一應俱全。而因為咁大規模嘅發展，令到唔少原本嘅地形或者自然環境都被改變、甚至消失。今次阿史想講嘅就係1850年代嘅寶靈頓運河！

寶靈頓運河，又被稱為寶靈渠，係一條喺1850年代末建立嘅運河，流經鵝頸一帶。咁點解會冇啦啦起呢條運河呢？原來寶靈頓運河原身就係黃泥涌嘅河涌，由渣甸山流到黃泥涌峽一帶，但每逢雨季，鵝頸澗都會泛濫，令黃泥涌一帶遍地泥濘，變成一片沼澤。總督寶寧於是就決定進行填窪工程，將兩邊堤岸加高，整成一條運河。

由於喺香港第四任總督寶寧任內建成，所以就用佢嘅名嚟命名。改建後嘅寶靈頓運河由於又長又窄，形狀彎曲，十足十一條鵝頸，於是流經嘅區域就被稱為鵝頸區，河道之上嘅橋就被稱為鵝頸橋，當年仲有電車喺上面行駛。時至今日，寶靈頓運河就已經因為1920年代嘅灣仔填海工程而變成一條下水道。