介紹完紅磡嘅天后廟之後,阿史就想講下香港為數唔少嘅天后廟。銅鑼灣嘅天后廟當然好出名,但就唔夠阿史接下嚟要介紹嘅呢座特色,事關呢座個全港唯一嘅水上廟—三角天后廟。

呢座位處木船之上,長期停留喺銅鑼灣避風塘及香港仔避風塘嘅廟宇,全稱係水上三角天后廟。廟宇嘅前身係位於珠江三角洲,但因為原來嘅天后廟喺日軍侵華期間被破壞,廟宇入面嘅神像由一家姓羅嘅漁民救起放到船上供奉。事件慢慢喺漁民之間廣傳開去,之後漁民合力籌錢,喺1955年建成呢艘「三角天后平安堂」,時至今日已經有成60幾年歷史喇!

史友們依家見到嘅,其實已經係第三代嘅船,規模上嚟講,呢間天后廟同時可以容納到9位善信,但就要先喺海邊自行坐三舨。雖然水上天后廟係幾有特色,但其實廟艇信眾一直都想廟宇可以上岸,而其實廟宇岸上嘅新址已經開始動工,預計今年年底就會上岸,所以史友們想睇就真係要把握機會喇!

原圖嚟自網絡