之前都有同史友們介紹過中國第一位無上皇,佢做無上皇嘅時間亦都唔算耐,但歷史上其實仲有一位在位時間更加短嘅皇帝,佢係金朝末代皇帝—金末帝。

金末帝,叫做完顏承麟,係金世祖劾里鉢後裔,本身係金國將領,因為驍勇善戰而受到金哀宗器重。咁原本只係一個金國將領,係點樣成為皇帝呢?原來喺天興元年(1232年),蒙古軍隊揮軍南下犯金,當時嘅金哀宗以「率軍抗蒙」為理由去咗汴京。沿途有唔少文武百官逃走,就只係得完顏承麟不離不棄,送到金哀宗去到蔡州。

喺蔡州度過短暫嘅歲月之後,蒙古軍喺天興三年(1234年)揮軍直進,包圍蔡州。哀宗深知亡國嘅日子即將到來,但自己就唔想做亡國之君,於是佢就諗到下詔禪位畀完顏承麟。完顏承麟初時唔肯,但喺哀宗相求之下就只好答應。就係咁,完顏承麟喺第二日即位冇耐,就要親身出去迎敵,展開激戰。哀宗最後自縊而死,而完顏承麟據講就死咗喺戰爭之中,但亦有講法話佢隱姓埋名生存落下。無論係邊個講法,佢都絕對係中國歷史上在位時間最短嘅皇帝。

原圖嚟自網絡