記得舊年國慶七十周年,大陸拍咗套《我和我的祖國》,講新中國成立七十年以來嘅部分重要大事,其中一段就係講香港回歸。個故事基本上係分開兩部分,一邊係講香港人點迎接回歸,一邊就講响香港主權交接儀式負責升旗禮嘅三位軍人嘅故事,而呢個故事其實係由真人真事改編而成。

當年負責升旗嘅軍人叫做朱濤,係當時三軍儀仗隊二中隊長。時任中國人民解放軍陸海空三軍儀仗隊大隊長程志強曾經憶述過,1997年3月接到參加交接儀式呢個任務到正式上台,儀仗隊只有唔夠四個月嘅訓練時間,朱濤亦自薦出任升旗手。當時程志強就同佢講,要佢跟住國歌練升旗呢組動作唔少過五千次,朱濤事後亦話自己練咗遠遠超過五千次。而目標只有一個,就係响國歌奏完嘅一刻,要準確無誤咁將五星紅旗升到旗桿最頂部。

雖然練咗咁多次,但正式升旗之前,朱濤非常咁緊張,儀式開始前就已開始流鼻血,程志強就攞棉花塞入鼻孔,好彩最後朱濤都完成任務。後嚟儀式後,程志強就發現朱濤成日都係血,原來朱濤响台上個鼻仍然流血,佢只好將啲血吸晒入個口度。

朱濤响香港主權交接儀式任升旗手,兩年之後澳門回歸佢又擔任升旗手。

原圖嚟自網絡