造船技術同日本齊名嘅太古船塢

早排介紹到講到港島北大空襲嘅時候，阿史就有提到當時太古船塢就係其中一個目標，咁到底呢個地方有咩咁重要，令到當時盟軍要對呢一帶進行大規模轟炸呢？

太古船塢以前位處今日太古城一帶，係由太古洋行開設喺1883年開始建設。喺早年，鰂魚涌一帶基本上都冇乜人以及建築物，太古洋行就決定喺呢個地方建立一個最龐大嘅工業區，既有太古船塢、太古糖廠及香港汽水廠。而喺當時，太古船塢唔單止係香港規模最大嘅船塢，同時都係亞洲數一數二嘅船塢，高峰時期有成5000個造船工人，相關嘅技術被稱為同日本齊名。

而喺日本佔領香港嘅時期，呢度就被視為其中一個轟炸目標，希望可以通過咁而切斷日軍嘅海運。太古船塢喺戰時被炸燬，但喺戰後就得到大規模嘅重建同埋發展。去到1970年代，隨住香港造船業式微太古船塢亦都搬到去青衣同黃埔船塢組成香港聯合船塢。