牛池灣以前叫「牛屎灣」?

尋日就同史友們講到牛池灣嘅三山國王廟，就有史友想阿史可以講下關於牛池灣嘅歷史，咁就當然冇問題啦！

關於牛池灣呢個地名，雖然喺清代嘉慶24年嘅新安縣誌入面就有記載到牛池灣，但其實最初呢個地方並唔係叫做牛池灣，而係有「牛尿灣」同埋「牛屎灣」嘅叫法，據講當中嘅原因係因為呢帶以前係放牛嘅地方，由於「牛屎」同埋「牛尿」都唔太好聽，所以就雅化做「牛池灣」

而關於呢個地名，仲存在住另一個講法。相傳喺牛池灣村附近，有一個好大嘅水池，遠處望去就好似一個訓咗喺水池入面嘅牛，所以就先將個水池叫做牛池；慢慢出面嘅村民就將呢條村叫做牛池灣村。時至今日，牛池灣嘅範圍亦都唔止係一條村落喧簡單，而係包括斧山道及清水灣道之間地方以及彩虹邨等。