早期香港嘅醫療系統唔發達,之前阿史就提過有唔少居住喺九龍嘅市民都需要過海睇醫生,咁住喺山頂嘅人雖然都係非富則貴,但如果有乜急病又點算呢?原來當年就起咗一間醫院為山頂區居民提供醫療服務,呢間就係明德醫院。

明德醫院,位處港島太平山奇力山,早年為唔少山頂居民提供醫療服務,去到1951年先開放畀所有病人用。提起呢間醫院嘅建立,講開有係有段故!故事返到1858年嘅聖誕節,有一對喺印度結婚嘅英國人夫婦Granville Sharp同Matilda Lincolne嚟到香港。男方就係一位商人,而女方就係一位慈善家。而佢哋一齊生活咗幾十年之後,Matilda Lincolne就過身喇,Granville覺得好傷心,決定興建醫院紀念亡妻。

Granville 生前訂立遺囑,就寫明會以亡妻之名成立醫院,免費醫治病患者,所以明德醫院(Matilda Hospital)就喺1907年1月27日正式啟用,照顧第一批病人。喺二戰期間,呢間醫院就被改成軍方醫院,後來仲不幸被山頂炸彈波及,去到1951年先進行過重建。現時建築物係二級歷史建築物,仲被美國專題周報《HealthExecNews》評級為全球第三最美麗醫院。

原圖嚟自網絡