消失的地名—西角

雖然東角已經因為填海而消失，但位於銅鑼灣附近嘅東角可能唔少史友以前都聽過，甚至去埋睇過怡和午炮。唔講真係唔知，其實港島一帶唔止得東角，以前仲曾經有過一個西角。

西角依家已經係一個消失咗嘅地名，有呢個叫法純粹係因為佢嘅英文名叫做West Point。咁到底西角喺邊個位置呢？早喺1845年嘅香港地圖入面，就已經喺港島西半最北嘅位置出現過西角嘅名，大約嘅位置其實係喺皇后大道同埋薄扶林道對出嘅位置，即係現時七號差館嘅位置。以前嘅西角並唔係住宅區，而係英軍軍營所有地，以前仲有個名叫做海軍灣。隨住區內慢慢發展，西角所指嘅範圍亦都出現變化，泛指成個西營盤同埋石塘咀區。

講開有講，雖然有唔少小巴同巴士都仲有用West Point呢個英文，但呢度嘅West Point指嘅就已經唔再係西角，而係西環。