早幾日就同史友們講到日軍喺赤柱同聯軍展開激戰，並且喺當時被用作軍用醫院嘅聖士提反書院進行過一場大屠殺。咁喺大屠殺之後，生還或者俘虜嘅人又會送去邊度呢？今次阿史就同大家介紹下赤柱拘留營。

赤柱拘留營嘅位置其實就係今日嘅聖士提反書院及赤柱監獄外圍一帶，係當時日軍用作拘留英國人或者其他歐藉人士嘅地方。呢個拘留營喺1942年1月設立，直到1945年8月日軍投降為止，足足有成2800幾個男女老幼被困禁咗44個月。

其實早喺1939年，英國政府就已經深知香港會被日軍攻占，採取不設防嘅措施並且提前疏散在港婦孺。只係強制撤離計劃過於倉促，唔少撤離者批評過早，亦有部分人未能撤離。時間去到1942年，喺日軍同聯軍交戰之後，日軍喺一份英文報紙上刊登咗一份通告，要求「敵國國民」到美利操場集合。最初有一部分人到咗上環囚禁，但由於環境太過惡劣，喺1942年1月底，大部分人都被轉移到赤柱囚禁。

當時有接近2800人被囚禁喺赤柱拘留營，拘留營只有極少必需品，並且要佢哋自行解決住房、食品同埋醫療等問題。而喺呢44個月嘅時間入面，有121人因為疾病而死喺呢度，直到1945年8月日軍投降為止，囚禁先至結束。

及後，聖士提反堂落成，西門上方有一個紀念窗，就係用嚟紀念赤柱拘留營嘅被拘留者。

原圖嚟自網絡