近代第一位華人牧師—梁發

現時大家都可以好容易接觸到唔同嘅宗教，唔講太遠，就咁講清朝，當時嘅人又可以點樣了解到西方宗教呢？當然早期係會有西方傳教士嚟到中國傳教，但講到在華傳教方面，就要介紹一下近代第一位華人牧師—梁發。

梁發出生喺1789年嘅廣東省肇慶府，佢被譽為係中國基督教嘅重要人物，同時都係近代第一位華人牧師，咁佢到底係點樣成為牧師呢？佢喺11歲嘅時候就入讀私塾，讀完私塾之後就先去到省城打工，學習畫工同埋印刷。冇幾耐去到1810年，佢喺十三行學印刷嘅時候就認識到英國傳教士馬禮遜同埋米憐，隨後仲跟埋佢地到馬六甲，米憐一方面叫梁發幫手印刷宣傳基督教書，同時都教導佢基督教嘅事宜。

而到咗1821年，馬禮遜就喺澳門立咗梁發做第一位中國嘅更正教傳教士，後來梁發就展開佢嘅基督教推廣同埋教學，先喺1828年成立第一所基督教私塾，設有教堂，既教啲小朋友中文，亦都有教埋科學同埋英文等學科。期間，佢仲刊行著名嘅傳教書籍《勸世良言》。《勸世良言》對後世接觸基督教有住好重要嘅影響，由聖經舊約、新約教訓入面挑選內容；另外一部分講述基督教教義。