上回喺介紹何啟嘅時候，阿史就有講到何啟唔單止建立第一所華人西醫學院，仲有為咗紀念忘亡妻雅麗氏而起咗一間雅麗氏紀念醫院，咁呢間醫院又係點樣發展嚟到今日呢？阿史就同大家再介紹下啦！

雅麗氏何妙齡那打素醫院嘅前身，其實正正就係1887年由倫敦傳道會同埋何啟所創立，香港第一間用西式醫療嘅華人醫院—雅麗氏紀念醫院。當年醫院係選址上環荷李活道，亦都係做埋教學醫院嘅用途，所以開業無幾耐就發生嚴重擠迫嘅情況。以上嘅情形維持咗幾年，醫院就決定同1893年位處般含道嘅那打素醫院合併，結成「姐妹醫院」。

去到1904年，何啟爵士創立埋中國第一間婦產科醫院，雅麗氏紀念產科醫院；再過兩年，就直頭將雅麗氏醫院和那打素合併。面對住床位不足嘅問題，何福堂牧師之女兒何妙齡其實都有捐錢興建過何妙齡醫院。

去到1954年，經過立法定案，決定將那打素醫院、雅麗氏紀念產科醫院及何妙齡醫院三家醫院合併為「雅麗氏何妙齡那打素醫院」。原本位於港島嘅醫院，最後喺1997年搬到大埔，成為目前大家見到嘅雅麗氏何妙齡那打素醫院。

原圖嚟自網絡