介紹咗聖士提反書院以及赤柱拘留營嘅歷史後,阿史就想講一個諗咗都幾耐嘅問題,就係點解赤柱會叫做赤柱,係咪真係因為有幾多紅色嘅柱?

唔講真係未必估到,原來喺英軍登陸港島初期,最多人口居住嘅並唔係中環,而係赤柱,足足係當時全港原住民嘅二份之一,所以喺中環一帶仲未發展嘅時候,英國人係先將赤柱當做香港嘅中心。有關赤柱嘅記載,早喺明代嘅《粵大記》就有標示過,呢度主要係水上人嘅居住地。赤柱唔單止係一個居民嘅聚落,其實仲係港島重要嘅軍事據點。喺清朝年間,呢度就已經被用作赤柱汛嘅營汛,去到1930年代就做埋黃麻角軍營,亦都喺二戰前設立過最後一個英軍據點,即係赤柱炮台。而喺二戰期間,雖然赤柱炮台對日軍造成唔少傷亡,但最後都係守唔住赤柱。

咁回歸返最根本嘅問題,到底赤柱點解會叫做赤柱呢?據講係因為赤柱以前有好多木棉樹,由於木綿樹都係紅色,所以喺日光照射之下,令到啲樹幹望落好似紅色嘅柱,所以就會叫做「赤柱」喇!

原圖嚟自網絡