1887年有場黃河決口？

近排長江一帶嘅水災仍然好嚴重，唔少地區都陷入一片汪洋之中，情況都幾令人擔心，阿史都想呢啲水災盡快過去。而喺歷史上，長江水災固然嚴重，但黃河都唔惹小，喺1887年就發生過一次黃河決口，呢次嘅災害被稱為近代中國人口損失最嚴重的一次洪水災害」。

時間返到1887年9月30日，即係光緒十三年，喺河南鄭州下汛十堡，就發生咗一次自1855年銅瓦廂決口改道後最大嘅一次決口，當時嘅情形有記載就係口門逐漸「刷寬至三百餘丈」，下游正河斷流。決水流入賈魯河、淮河，豫、皖、蘇「三省地面約二三十州縣盡在洪流巨浸之中」。即使清朝政府已經搵咗吳大澂接辦堵口工程，並喺1889年1月20日（光緒十四年）合龍成功，但仍然造成唔少傷亡。據估計，當年為治理呢個決口，足足用咗清政府四分一嘅年收入，即係接近一千萬兩白銀。

據當時統計呢次嘅決口令到大量人直接罹難，有講法話700萬人，亦都有講法話有200萬人傷亡，無論係清史研究學者定係西方學者都形容，呢次係「人類歷史上最致命的自然災害之一」。