近排疫情又耍次爆發，阿史冇乜好做唯有又睇返啲旅遊節目，而呢次就睇到關於趙州橋嘅介紹，又想同史友們講一講。趙州橋位於河北省趙縣城南五里洨河上，又叫做安濟橋，當地人就直接叫呢條橋做「大石橋」，而相對嘅附近就有一座「小石橋」。而呢條被稱為中國現存並且最早嘅石拱橋到底係幾時建成呢？

答案就係隨朝。一般嘅睇法都係認為趙州橋始建在於隨朝大業六年（605年），民間傳說安濟橋係魯班一夜之間修建而成但其實係出自隋代傑出工匠李春，唐代就有過咁樣嘅一段說話記載石橋「趙州交河橋，隋匠李春之跡也。製造奇特，人不知其所以為。試觀乎用石之妙，楞平砧斫，緘穹隆崇，豁然無楹……」。而呢條橋並唔係由隋朝建成之後就一直咁樣，反而係喺唐宋明清都有過唔同程度嘅維修，當中去到晚清嘅時候就對橋體進行過大規模嘅維修。

對於趙州橋，中國建築史學家梁思成就曾經到過並且進行調查，當時佢就提出擔憂，指出趙州橋「已經顯然有向外崩倒的傾向」，仲擔心「此無價之國寶，行將毀滅」。1935年，梁思成與考古學家李濟曾有提案重修石橋，但就冇下文。而去到1950年代，趙州橋就進行過大修，雖然已經係以「極力保持橋的舊觀為主旨」，但由於係採用原橋舊技術，既需要換上新石，又「不能讓水泥灰漿將券石底皮沾污」等條件限制，令到最後大橋出嚟已經唔同咗樣。

有人認為咁樣係為咗及時救返條橋，又有人認為古橋已名存實亡，唔知史友們又點睇呢？

原圖嚟自網絡