今朝就同史友們講到華工喺晚清果陣因為各種原因而要「賣豬仔」，一般嚟講佢哋賣身嘅年期都係有3年、5年甚至10年不等，除咗落南洋，去美國亦都係當時主流嘅一個需求地。喺美國，呢條第一條橫貫大陸嘅鐵路線就係由華工主力負出血汗而建成。

呢條鐵路始建於1863年，歷史接近六年成功通車。喺建造鐵路嘅初期，正係美國結束內戰冇耐，百廢待興。當時美國就打算起一條貫通東西岸嘅鐵路，去改善國家經濟，原本打算招募5000個鐵路工人，但最後只係得幾百個美國人見工。與此同時，奴隸制度以及黑奴都唔能夠再用，當時美國人就諗到可以招募華工。

據1865年嘅數據，第一批到美國嘅華工到達舊金山之後，就令到成個工程入面嘅人口比例有九成都係華人，高峰時期參與鐵路工程嘅華工數量多達1萬至1.5萬人。成個工程其實相當艱辛，因為要貫通美國東西兩岸，但係挖掘機械不足，令到唔少華工都要喺極端環境中開山劈石、清除障礙物，唔少工序都係徒手完成。其中最難嘅一段就係用修棧道方法喺內華達山脈打通花崗岩石牆，貫通塞拉嶺通道，亦都令到唔少華人死亡。1867年，冬天開鑿長達1600英尺唐納隧道果陣，仲連續兩年遇上美國歷史上罕見嚴冬，令到唔少華工都活活凍死，有啲仲遇上雪崩，認真慘烈。

隨住鐵路線完成埋內華達山脈以及洛磯山脈嘅貫通工序，令到呢條施工艱巨程度超過預期嘅鐵路提前咗7年完成。但令人痛心嘅係，佔九成工人比例嘅華工用盡汗水同鮮血，但就冇被邀情參加竣工儀式，甚至連儀式上致謝詞都冇提到佢哋，呢點亦都被視為係美國所犯嘅歷史錯誤，下篇再同史友們講一講。

原圖嚟自網絡