繼續同史友們騎住駱駝去旅行，上次就同大家講到西域七雄之一，消失嘅古城樓蘭古城，咁到底呢個一度喺歷史長河中消失嘅古城係點樣重新出現返呢？

樓蘭古城現時係號稱世上最貴嘅景點，單係入場門票就已經需要接近四千人民幣，真係唔講得笑。而呢個古城當初係由一位瑞典探險家斯文·赫定發現。喺1901年，佢聯同探險隊就去到乾枯嘅孔雀河、羅布荒原一帶考察。點知途中經過沙漠嘅時候，就唔小心唔見咗個鐵剷，佢嘅助手好快就去到宿營嘅地方搵返，而且仲帶埋幾塊木雕殘片。

見到木雕殘片之後，斯文·赫定就好開心，即時決定要繼續挖掘，好快佢就發現到一座佛塔、三個殿堂以及一啲木雕建築構件、五銖錢等大批文物，佢哋仲沿住羅布泊西岸搵到一個被風沙掩埋嘅古城，正係樓蘭古城。據事後嘅考察，成個古城基本上邊長330米，掩埋喺流沙之中，當時由於有唔少珍貴文物包括錢幣、絲織品、糧食、陶器等保存相當完整，令到樓蘭古城當時被稱為「沙漠中的龐貝城」。

因為呢次發現，令到唔少國家嘅考古學家同埋地質學家都嚟到呢度考察，發掘出數量豐富嘅文物，包括漢錦和晉代手抄《戰國策》，但亦都係因為呢個過程，令到大量樓蘭文物被國外考察團掠走。

原圖嚟自網絡