早幾日阿史就同史友們講到全球最龐大嘅百科全書《永樂大典》，而喺後來嘅清朝，其實都有一部號稱係最龐大嘅類書，今次就叫做《古今圖書集成》。

《古今圖書集成》又叫做《古今圖書匯編》，係康熙年間由一位叫做陳夢雷嘅官人編輯而成。關於呢部類書嘅編成，講開真係有段故。陳夢雷本身係一位朝中官員，但就因為附逆罪喺康熙二十一年流放奉天。直到康熙三十七年東巡先將佢放還，仲等佢可以去同三皇子誠親王胤祉伴讀。三年之後，陳夢雷根據「協一堂」藏書同埋家藏一萬五千多卷典籍，以「目營手檢，無間晨夕」嘅方式，編纂《圖書彙編》，歷時五年喺康熙四十五年完成初稿。康熙御覽之後覺得仲需要修訂增益，但就改賜書名《古今圖書集成》。

當康熙逝世，誠親王胤祉失勢，陳夢雷就再次受到株連被流放到黑龍江，《古今圖書集成》由經筵講官、戶部尚書蔣廷錫重新排校，陳夢雷編書之名就被抹去，至於呢本書就喺雍正四年（1726年）校成。

講開又講，全書有成一萬卷，另外再加四十卷目錄。書嘅內容分成曆象、方輿、明論、博物、理學、經濟等六彙編；每編又再分三十二典；每典又分成共6117部，認真誇張。叫得做圖書集成，書入面就當然有埋圖、表、列傳、藝文等類別，最後出到嚟有成50多萬頁、1.7億字、過萬幅圖片。

原圖嚟自網絡