早排阿史就有介紹過1944年嘅盟軍大轟炸以及一間好具規模嘅觀音廟，當時其中一個提到嘅地方就係紅磡，但史友們又知唔知紅磡呢個地名係點樣嚟？

紅磡最初並未係一個地名，反而喺1844年果陣，最先有嘅係紅磡灣。關於紅磡嘅出現，同一個有啲傳說色彩嘅故事有關！相傳喺1909年果陣，有一個建築工人就喺打一口井果陣，發現當時喺井湧出嚟嘅水係紅色。工人見到咁嘅情況之後，都唔敢要繼續工程，只好走去問風水專家。當時嘅風水專家就話，工人唔小心傷到龍脈，流出嚟嘅其實係龍血。亦都因為呢啲紅色嘅井水，令到呢區有咗紅磡嘅稱呼。而事後，雖然呢啲紅色水被證實係化學物質，但工人同坊眾都起咗間觀音廟嚟供奉。

當然，以上呢個都只係口耳相傳嘅故事，至比較有可信性嘅講法，就有以下呢種。喺1819年清代嘉慶年間編寫《新安縣志》入面，就有講到一條叫做赤磡村嘅地方，「赤」通「紅」嘅意思，所以就有人相信呢條村其實係紅磡。而地形上嚟講，「磡」係指凹入海邊嘅地方，再加上1856年前呢一帶都有唔少紅色嘅岩石，所以叫做紅磡就有咁樣嘅根據。喺一啲航海記錄好似1827年《印度名錄之東印度群島和中國等地的航道》，就有船隻經過汲水門時有描述過「那裏是淺灘，應以中航道靠近北岸處（那處有很紅的外觀）航行」，而呢度就係紅磡喇！

原圖嚟自網絡