大埔墟一帶早年曾經被視為係成個新界嘅中心,有過唔少重要嘅政府設施例如就有阿史曾經介紹過嘅舊北區理民府同埋舊大埔警署。唔單止有政府設施,就連九廣鐵路當年興建嘅時候都要設立一個站喺呢度。

現時嘅舊大埔墟火車站位置,就已經被活化改建成香港鐵路博物館,專門介紹香港鐵路運輸歷史。講起呢個火車站,就要喺20世紀初講起。舊大埔墟火車站建成於1913年,係成條鐵路入面重要嘅車站,亦都係唯一中國傳統建築風設計嘅車站,仲保留住獨特金字頂型以及唔少有祝福意味嘅灰塑圖案。

早年嘅九廣鐵路仲係以蒸氣機火車頭為主,直到喺1982至84年引進電氣化火車,同時令到新嘅大埔墟火車站於1983年啟用。喺兩個條件之下,令到此舊大埔墟火車站於同年4月6日關閉,而舊有嘅火車站亦都喺1984年被列為法定古蹟,並改建成博物館。

現時嘅博物館內,放置咗多個歷史車卡,既有手動同機動工程車,亦都有沙頭角支線用過嘅軌蒸氣機火車頭、1955年引進嘅首台柴油機車等等,史友們如果疫情緩和之後,都不妨可以去睇一睇!

原圖嚟自網絡