上次同史友們介紹完中國現存最古老嘅石拱橋趙州橋之後，就有史友話想阿史再介紹多啲中國嘅古建築，咁阿史今次就同大家介紹下佛宮寺釋迦塔！

佛宮寺釋迦塔又叫做應縣木塔，位處山西省朔州市應縣，直頭就係世上現存最古老並且最高嘅一座木塔。呢座木塔確實幾時建成現時就仲未有一個結論，但按照木塔嘅建築風格同埋所遺留嘅文物，可以大概推斷到係遼代嘅建築物，而且仲喺金、元、明、清多次修葺。一般嚟講，越高嘅建築物都係好容易因為地震而倒塌，但佛宮寺釋迦塔就經歷過多次地震都冇出現過傾倒嘅現象，甚至喺1926年軍閥混戰入面被炮擊都冇大損傷。

呢座由遼道宗賜名嘅「釋迦塔」出面睇落樓高五層，但內部就只有四層，整體都係以木質做主要結構，塔頂就係鐵製塔剎，每層都有一尊佛像，其中一層就一尊10米高嘅釋迦造像。塔內有唔少珍貴嘅文物，就好似明成祖所留牌匾「峻極神工」、明武宗所留牌匾「天下奇觀」，甚至仲有舍利佛牙、佛家七寶等等。

到底點解佛宮寺釋迦塔可以存世咁耐？歷代都有唔少學者做過研究，其中一個原因就係因為呢度有54種唔同嘅斗拱類型，喺面對地震等等嘅劇烈震動嘅時候都可以發揮到作用。由於木塔嘅結構係咁複雜，關於佢嘅維修方案大大話話由70年代開始討論，去到2013年先有結論，認真誇張！

原圖嚟自網絡