因為1953年嘅一場石硤尾木屋區大火,香港政府就開始興建簡單實用而且租金廉宜嘅徙置大廈,呢個就係香港公共屋邨嘅開端。早期嘅公共屋邨仲未係好完善同人性化,但當時彩虹邨就係好特別嘅一座,成個設計仲令到佢拎到香港首個建築獎項。

彩虹邨位於牛池灣,屋邨前身其實就係九龍十三鄉之一嘅沙地園。沙地園喺1958年被批出畀屋宇建設委員會興建大型屋邨,短短四年就建成第一批樓宇,成個工程分成六期進行,直到1964就完全建成。彩虹邨當年係屬於比較有規劃嘅屋邨,一共就有8幢20層高長型高座同埋3幢7層高相連式低座住宅大廈,7層高嘅大廈當時仲未有升降機。

呢個由巴馬丹拿建築及工程師有限公司設計嘅公共屋邨,喺1965年就拎咗香港建築師學會銀牌獎。原因就不外乎幾樣,呢度每個單位都有客飯廳、露台、廚房、浴室連洗手間等等,並且當時屋租只係48至130港元,係一個普通工人可以負擔嘅水平。而且區內亦都有唔少學校、街市同埋商戶等等,早年嚟講配套已經算幾好!

原圖嚟自網絡