喺西周時期有唔少好有歷史價值嘅青銅器，當中就有一件係刻有銘文記事，珍貴到直頭被列為禁止出境展覽嘅國家一級文物，呢件就係虢季子白盤。

呢件文物嘅身世都幾顛簸，先喺清道光年間喺陝西寶雞虢川司出土，後來就被陝西眉縣縣令徐燮占有，帶到常州。點知冇幾耐就撞太平天國事件，令到呢個白盤易主，由太平天國護王陳坤書持有。去到清朝同治年間，直隸陸路提督劉銘傳喺常州同太平天國交戰，攻陷常州之後就入到陳坤書府邸，點知發現呢個盤底有銘文嘅文物竟然係馬槽所用。

劉銘傳認為呢件係稀世珍寶，就偷偷地叫安徽嘅家人小心保管，唔好張揚，並且自己冇幾耐就卸甲歸田，專門整咗一個亭放置銅盤，仲將自己對呢個虢季子白盤嘅研究記錄成書《盤亭小錄》。劉家後人其後喺抗日戰爭發生期間，逃亡之前就將虢季子白盤埋喺後院3米深嘅土地之後，一直都冇被人發現。直到1949年，劉銘傳第四代孫主動將虢季子白盤上繳畀政府。

咁到底呢個虢季子白盤記載咗咩事？成個盤有111個字，係四字一句組成嘅韻文，記述周宣王十二年（公元前816年）虢季子白喺洛河北岸大勝獫狁（匈奴的先祖）嘅事。呢場戰爭入面殺死五百敵人，活捉五十俘虜，宣王舉行隆重慶典表彰他的功績，賞賜了馬匹、斧鉞、彤弓、彤矢。虢季子白就特製呢個盤紀念。「虢季子白盤」之所以咁重要，全因呢段銘文見證西周初年分封制存在，仲確實起到「以藩屏周」嘅作用。

原圖嚟自網絡