提到近代中國嘅建築史學家、致力於保護中國古代建築同埋文化遺產嘅人，阿史即時就諗起一個人，就係林徽因嘅配偶梁思成。曾經做過中央研究院院士嘅梁思成，喺後世就同呂彥直、劉敦楨、童寯、楊廷寶合稱「建築五宗師」。

梁思成並唔係出生喺普通家庭，佢父親係清朝著名嘅政治家梁啟超，因為發動戊戌變法而需要流亡海外，亦都係因為咁而令到梁思成喺日本東京出世。而喺辛亥革命之後，梁思成就同家人一齊返到北京，佢隨後就喺北京讀書，仲入埋當時嘅北平清華大學。

去到1924年，佢同林徽因相識，並且去到美國費城賓夕法尼亞大學、哈佛大學學習建築史，兩人一邊學習一邊去到歐洲考察當地嘅歷史建築，冇幾耐就回國喺東北大學任教，創立咗當時第一個建築學系，亦都展開考察行動就好似清昭陵、瀋陽鐘鼓樓、天津市規劃等等，亦都提出保育方案，進入中國營造學社工作，當時嚟講相當前衛。

而講到梁思成參與過嘅修復工作，就當然會提到1932年主持故宮文淵閣，亦都係因為呢次緣故令到佢開始深入研究中國古代建築，由宋代建築開始到清代嘅文獻都深入研究，仲同妻子林徽因喺之後兵荒馬亂嘅日子走訪中國十五個省，二百幾個縣，研究同記錄二千幾年由唐代到清代嘅古建築，仲將相關發現寫成文章到國外發表。

喺日本侵華期間，梁思成對保護中國歷史建築免受炮火摧毀都作出過好大嘅努力，喺呢段時間佢積極培養建築師，亦都繪製重點保護文物地圖畀盟軍以免受到轟炸，並且連奈良京都嘅古蹟保護都可能同佢有關。至於最出名嘅平津戰役入面，繪製北平古物保護地圖區塊避免受到炮擊，亦都係由梁思成同埋林徽因一手一腳做出嚟，並且努力游說雙方，先至保留到今時今日有咁多古物嘅北京城。

原圖嚟自網絡