大磡村有「三寶」？

早排阿史就同史友們講到九龍十三鄉之一嘅大磡村，喺日佔時期就因為日軍想擴建啟德機場都被夷為平地，原村嘅朱氏未能喺原址復村。而喺戰後，香港嘅工業興起，令到大磡村得以發展，當時就有「大磡三寶」。

喺1950代戰後，除咗因為香港工業興起令到人口興旺，有唔少小型工廠出現，亦都令到部份工人開始建立自己家園，間接復活咗大磡村。而除咗寮屋區，其實當時「大磡三寶」之一嘅大觀園其實係高尚住宅區，唔少戰後走難落嚟香港嘅富有人家都選擇搬入呢度。當時大觀園係由鑽石山石礦場嘅石塊所建，就只有22戶人，而每戶都有個花園，而且環境相當清幽，連已故影星喬宏都係住喺呢度，佢嘅故居就係唯一被保留嘅房屋。

而除咗大觀園，大磡村另外兩寶就係香港三級歷史建築、香港現存唯一戰前機庫、1934年興建嘅前皇家空軍飛機庫同埋一個被列為二級歷史建築嘅附屬設施的機槍堡。雖然以上「三寶」都被保留落嚟，但到底會點樣展示同埋復修，就仲未有相關嘅消息。