提到香港早期嘅富商，可能有啲史友即時會諗到納稅總額全港之首嘅李陞，但傑出嘅華商又點止一個，第一代嘅華人船王郭甘章（或者叫郭亞祥）同樣都好巴閉！

郭甘章係19世紀嘅香港富商，當時係靠住經營買辦同埋航運業而發達，但佢早年其實主要喺上海發跡。郭甘章出生喺一個廣東香山嘅水上人家，冇幾耐就嚟到香港定居，最早期做嘅工作就係幫英軍輸送糧食同埋飲用水。去到1845年，佢就得到鐵行公司香港分行聘請做買辦，短短七年就依靠咁樣獲得第一筒金。

1852年，郭甘章就去到上海建立咗一間船廠，當時嘅工作就係幫手修理外國船舶，後來仲喺原先做買辦嘅鐵行公司購入機械工程廠同埋船廠，展開佢嘅船業王國。咁佢又係點樣成為香港第一代華人船王呢？原來嚟到1860年代，佢就喺香港成立一間發興行，專門經營來往香港、澳門同埋廣州嘅客輪服務，再加上原本船業同維修嘅產業，令到佢有足夠資金擴充埋地產同埋其他領域。去到1881年，佢就已經成立當時向香港政府繳交最多差餉嘅人。

叫得做船王當然要有返啲船先似樣。全盛時期嘅郭甘章就擁有13隻汽船，係當年香港航運界嘅華人船王。唔講唔知，郭甘章之所以喺上海同埋香港可以有咁大嘅成就，除咗個人才能，仲同佢識講「洋涇濱英語」有關。其實唔係咩特別嘅語言，只係「Chinese Pidgin English」中文方言同英文夾雜埋一齊，但咁樣已經足以令到佢同外國人有良好嘅溝通，成就一代船王。

原圖嚟自網絡