「九五之尊」係咩意思？

近排大台就重播果套由江華、張可頤同埋吳美珩主演嘅《九五至尊》，呢套劇當年嚟講都真係收視神劇，更加係唔少史友嘅回憶。果時阿史就已經有個問題，就係點解要用「九五之尊」嚟形容皇帝，當中到底有咩意思呢？

古代都係用九五之尊嚟到稱呼帝王，唔講真係未必知道原來「九」同「五」呢個兩數字係有咁深層嘅含意。所謂嘅「九五」係囊括大千世界，享盡人皇氣運。中國古代就一早將數字分為陽數同埋陰數，奇數就係陽數，而偶數就係陰數。喺陽數入面，就以「九」排行最高，而「五」就居喺中位，即係表示具鼎盛之势，不偏不倚，亦都有位高而不傲嘅意思。

喺《易經·乾卦》九五入面就有講到「飛龍在天，利見大人」，首卦為乾為天，亦都代表係帝王嘅卦象，而且乾卦六爻皆為陽，第五爻就被稱為九五，九五就係乾卦中最好嘅爻，乾卦係六十四卦第一卦，亦都令到九五成為六十四卦三百八十四爻嘅第一爻，就咁被理解成帝王之相。