同香港、新界一樣，九龍同樣都被稱為係香港三大地域之一，之不過對於「九龍」呢個地名起源，阿史諗咗好耐都未諗明，到底係咪真係有九條龍呢？

九龍，喺唔少書籍同埋歷史文獻都係稱為九龍半島。喺地理上嚟講，呢個地方係屬於香港嘅中心，並且三面環海，十八區入面就有五個區域係屬於九龍。雖然經歷過多次填海工程令到九龍嘅面積達到47平方公里，但仍然都係香港城市規劃三大主要部份入面最細嘅一個。

提到九龍嘅歷史，雖然早喺漢代時期就已經有人居住，甚至仲有李鄭屋漢墓同埋晉代陶器嘅出土，但喺南宋之前嘅記載就唔多，早年亦都只係番禺縣管轄嘅一個地方，咁到底幾時開始先有「九龍」呢個地名呢？

相傳「九龍」地名嘅起源係同九條龍脈有關！簡單嚟講喺九龍北部就有八條好重要嘅山脈被視為係龍脈，包括鴉巢山、煙墩山、獅子山、雞胸山、慈雲山、大老山、東山、飛鵝山。史友們睇到呢度可能會問，咁數都只係得八條，第九條呢？原來第九條係計埋宋帝昺本人，連埋呢位「真龍天子」，就岩岩好係「九龍」喇！

原圖嚟自網絡