賭王何鴻燊早前與世長辭，享年98歲，早排完成舉殯大殮儀式，就宣佈會擇日再安葬，遺體暫時就移送往東華義莊暫存在「天字一號」，可能有啲年輕嘅史友會唔清楚東華義莊嘅歷史，咁阿史今次就同大家介紹下啦！

目前嘅東華義莊就係1899年所遷建嘅大口環，但佢嘅歷史其實唔止咁短，早喺1875年文武廟就曾經喺西環牛房一帶捐款興建過一座義莊，所以當時又叫做「牛房義莊」。喺香港開埠初期，唔少人都係飄洋過海嚟到香港，部分就客死異鄉。但係，當時保存屍體嘅手法並唔發達，唔少屍體都好易腐爛發臭，所以就需要先行入殮再暫厝義莊。西環嘅「牛房義莊」運行咗一段時間就因為城市發展而需要搬遷，喺1899年搬到大口環現址，正式叫做「東華義莊」。

如果要講到「東華義莊」最興盛嘅時候，大概都係上世紀嘅50、60年代，當時由於火化技術冇咁普及，義莊入面最犀利果陣有靈柩600具，骨殖逾8000副，而呢個「盛況」隨住火化技術發達慢慢就冇再出現。

「東華義莊」現時有兩個大堂，七十二間莊房，分成幾個唔同年代建築，有齊中西風格亦都令到呢個地方得到聯合國教育、科學及文化組織頒發「二〇〇五亞太區文物修復獎」優越大獎同埋榮獲古物古蹟辦事處頒發的香港文物獎「文物保存及修復獎」榮譽大獎，認真巴閉！

唔講真係唔知，有唔少名人都係曾經寄厝喺呢度，就好似前北大校長蔡元培、廣東軍閥陳炯明等等，至於東華醫院創院總理之一鄧鑑之夫婦喺1906年以及1915年離世之後，就一直都寄存咗喺義莊入面，足足百幾年時間。

原圖嚟自網絡