三個少年企圖炸毀礦山 只為摧毀日本軍備原料來源

之前阿史就同大家介紹過安達臣道石礦場嘅大上托，而香港昔日又點止一個礦場，全盛時期有接近二十個唔同種類嘅礦場分佈喺全港，而今次阿史就想介紹下蓮麻坑鉛礦場，呢個地方有一個好特別嘅故事。

蓮麻坑位於北區嘅邊境禁區，喺沙頭角同埋打鼓嶺之間，由於早期唔係人人都入得，所以自然環境保存得好好，盛產一種當地人叫做「蓮麻」嘅山橙，所以呢個地方都得名蓮麻坑。清代《新安縣志》入面就有講到，喺康熙年間就有唔少廣東人因復界而四出搵地方移居，蓮麻坑就係其中一個，全盛時期有過千居民居住，以種稻米務農為生。後來就因為《展拓香港界址專條》而被一分為二。

講咁耐，到底蓮麻坑係幾時發展礦業，當中又有咩故事呢？原來喺1930年代尾，當時港府就喺呢度開採鉛礦鋅、黃鐵礦、黃銅礦等礦物，而到後來日軍侵占香港之後，都發現到呢個地方嘅礦物，專門嚟開採以應付軍備需求。去到1943年，就有三個住喺蓮麻坑村嘅少年，佢哋分別係葉維里、葉盤嬌、葉煌青嘗試去炸毀礦山，希望咁樣可以摧毀日本喺香港嘅軍備原料產地。但係，佢哋呢次嘅爆破行動係失敗咗，仲畀日軍逮捕、遭毆同埋折磨，經過一段時間先獲釋。