中環以前有座大鐘樓

如果史友們有睇過一啲二十世紀初香港嘅舊相，應該唔難發現當時嘅港島中環一帶，有好大規模嘅一片英式建築，由郵政局、銀行、甚至酒店都有。而喺呢啲建築入面，阿史今次就想講下一座「大鐘樓」。

呢座大鐘樓係位於港島中環皇后大道中同埋必打街交界，所以後來嘅人都叫呢座鐘樓做「畢打街鐘樓」。大鐘樓據估計係喺1861至1862年間興建，樓高五層大概有25米，喺當時建築嚟講真係算好高。鐘樓係由一位被稱為 Rawlings嘅人設計，而原有嘅設計早期其實唔足夠錢興建，要靠當時德忌利士洋行東主德忌利士捐款先令到呢件事事成。

咁起得鐘樓，報時當然係一個目的，而當時鄰近海邊，呢個鐘樓仲有夜間導航嘅功用，真係估佢唔到。而更加估唔到嘅一件事就係，呢座鐘樓仲負責埋報火警，原理就係用鐘聲嘅次數代表火警地區，例如一聲就係東區灣仔一帶、兩聲就係中區中環、三聲就係西區西營盤等等。