「鹿鳴宴」係點嚟？

話說文憑試放榜就冇幾耐，喺現代嚟講可能都會食餐好嘅慶祝下，咁喺古代科舉過後又會食啲乜？原來自唐代開始，喺科舉制度入面就有一種叫做鹿鳴宴嘅宴會。

鹿鳴宴始於唐代，係一種專門為鄉試之後新科舉人而設嘅宴會，至於點解會叫做「鹿鳴」，歷代都有唔少講法，有指係因為喺宴會之上要唱吟一首唱吟《詩經·小雅·鹿鳴》「呦呦鹿鳴，食野之蘋。我有嘉賓，鼓瑟吹笙」，所以就叫鹿鳴；亦有指係因為呢個宴會以「鹿」為主脯，意指天子覓才、重才之宴。

呢個宴會一般係設立喺鄉試之後第二日，由地方官吏主持，除咗會有新科舉子到場，仲會有內外簾官。相關嘅宴會由唐代起源，去到明清都仍然沿襲，而且變得更加隆重。就好似明代咁，直頭就會由皇帝宴請科舉學子，仲喺宮廷設立以「鹿」為主脯嘅御膳；去到清朝，就會由省內巡撫所主持宴會，席間會唱詩跳舞，認真誇張。