喺近排嘅中美外交風波入面,兩國除咗互相關閉大使館之外,雙方嘅對話都有唔少故可以講,例如外交部發言人華春瑩批評蓬佩奧想將自己「塑造成廿一世紀的杜勒斯」,咁到底杜勒斯又係邊個嚟呢?

後生啲嘅史友可能唔知,杜勤斯其實係20世紀共和黨嘅一個政治人物,亦都係第52任美國國務卿,係冷戰早期一個重要人物。杜勒斯出生喺一個華盛頓政治世家,屋企就曾經出過兩任國務卿,畢業於普林斯頓大學同埋華盛頓大學嘅佢,1911年嘅時候就從事律師事務所工作,同當時唔少大公司同埋財團都有住密切嘅關係。而喺一戰之後,佢就負責擔任美國代表團嘅法律顧問參加和會,從此踏上從政之路,1944年就已經成為共和黨外交政策主要發言人。

去到二次世界大戰結束,佢先後為對日問題上進行調解,令多個國家簽訂《舊金山和約》。佢喺1953年1月艾森豪威爾任命佢做國務卿,出名嘅事蹟當然有同埋喺中情局做局長嘅細佬一齊策動阿馬斯從宏都拉斯入侵瓜地馬拉,控制各個香蕉共和國。

點解中美外交風波會提到佢?事關佢喺冷戰初期唔單止主張用相當強硬嘅態度同蘇聯競爭,而且仲喺1954年日內瓦會議上,命令美國代表團成員不得與中華人民共和國國務院總理周恩來握手,又單方面簽署《中美共同防禦條約》等等,種種強硬嘅手法當時被認為係麥卡錫主義嘅表現。

原圖嚟自網絡