關於石橋類嘅建築，阿史之前就同史友們提過有河北省趙州橋，但唔講真係未必知，香港曾經都有一條好有歷史價值，號稱係全港最長並且最堅固嘅石橋同碼頭，名為龍津石橋。

龍津石橋位處九龍城區，喺1873年興建，歷時兩年建成，全長達到200米，寬2.6米，一共分成南北兩段。石橋主要以花崗石建成，喺橋頭位置仲有一個接官亭。石橋一共有21條柱，喺1892年就曾經以木材加建過，令到總長度一共去到300米。咁點解九龍城區會有呢條石橋存在？原來喺19世紀中葉，就有唔少洋商都會利用船隻偷運洋貨、鴉片入口中國，當時大鵬協同埋九龍巡檢就想先由打擊船隻停泊補給開始，於是就喺九龍寨城東面小河「龍津」興建呢個石碼頭。

龍津石橋先後成為旅遊景點同埋九龍寨城官民常用嘅碼頭，去到1910年就被港府改建成水泥碼頭，1920年代亦因為要發展啟德濱而令到北段龍津石橋被埋、接官亭被拆卸。咁心水清嘅史友可能會問，咁南段碼頭又點解會搵唔到呢？原來喺日佔時期，日軍大規模擴建啟德機場，除咗拆卸啟德濱樓房，仲直頭埋咗成條龍津石橋，所以多年嚟都未展開發掘。

直到1998年啟德機場停用，發掘工程先分階段展開。2008年3月，考古學家就發現一段龍津橋及9座石橋墩，同年11月仲搵到1875年龍津橋、上下船平台、碼頭石墩等遺址。今年年初，政府仲宣佈會用6.86億元原址保育，認真犀利！

原圖嚟自網絡